susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Egunerokoak | Berriro »

Behi eroak / Patxi Iturregi / Elkar, 2003

Pertsonaia bitxiak Javier Rojo / El Correo, 2003-10-08

Ezin esan daiteke Patxi Iturregi gehiegi argitaratzen duten idazle horietakoa denik. Orain aurkeztu berri duen liburu hau, “Behi eroak” izenburua duen narrazio bilduma, bigarrena da, oker ez banago, idazlearen literatur ibilbidean. Hango narrazioak lotzen dituen haria protagonisten izaera berezietan aurkitu behar dugu. Izan ere, protagonista guztiek, aldez edo moldez, normalitatetik urruntzen dituen ezaugarriren bat dute. Edozein logikaren kontra eraiki nahi duen arkitektoa edota krokodiloak erasotzen duen modeloa; lapur txapuzeroak zein rock munduko izar akituak: honelako pertsonaiek osatzen dute “Behi eroak” izeneko liburu honen fauna. Gehienak, edonola ere, barregarri zamarrak dira beren jokaeretan eta alde honetatik zenbaitetan idazleak liburu umoretsua egin nahi izan duela iruditu zait. Umorea, ordea, askotan sarkasmora lerratu ta mingostasun puntu batez hornituta agertzen da istoio hauetan. Idazkeraren aldetik, liburu modernoa-edo eskaini nahi izan du egileak, han da, bere testuinguruari zuzenki lotua. Honek, nire ustez, arazoa ekar diezaioke idazlanari: gustura irakurtzen den liburua da, baldin-eta denboraren igarotzeak zaharkituta uzten ez badu, zeren askotan modernoena baita izaten arinen zaharkitzen dena.