susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Diotenez | Kresal usaina »

Zakur kale / Harkaitz Zubiri / Susa, 2007

Konpetentziako hiria Javier Rojo / El Correo, 2007-09-26

Harkaitz Zubirik “Zakur kale” izenburua duen narrazio bilduma idatzi du. Liburu honetan Donostia hiriaren bestelako ikuspegia ematen saiatzen da. Alde batetik, marko paregabearen topikotik ihes egiten du liburuan, bertan agertzen zaigun hiria ez baita hondartzaren inguruan eraiki den postal turistikoa. Liburuaren meritu nagusia ez da hori, ordea. Izan ere, ahalegin interesgarria egin du idazleak bestelako topikoetan ez erortzeko. Askotan, idazleek Donostiaren irudi topiko horren kontra aritzen saiatzen direnean, Donostia zaharreko giro marjinatua eta askotan hiper-abertzalea, hau ere bestea bezain topikoa, erakutsi nahi izaten dute, bi mutur hauen artean ezer ez balego bezala. Ez da gipuzkoarren edota donostiarren kontua bakarrik, Bilbo euskal literaturaren gunetzat jartzen denean ere halakoak agertzen baitira. Zubirik erakusten duen hiria bestelakoa da, norberekeriaren hiria, dirua irabazteko edozein gauza egiteko prest dagoen jendearen hiria, igotzeko konpetentzian ahalegintzen direnen hiria. Mendebaldeko hiri burges normal bat, alegia. Narrazioek elkarren artean lotura xumea dute, eta beraz liburu hau ia zatika eraikitako nobelatzat ere har liteke.