susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Intzentsua lurrean bezala | Etorkizuna »

Amairu kontakizun / Anastasio Arrinda / Euskerazaintza, 1988

Amairu kontakizun Dabid Zuazalde / Argia, 1988-09-18

Lazkaon hasi eta Deban bizi den idazle honek liburu berri bat agertarazi digu, kontakizunetakoa oraingoan, ugari egin baditu ere azken aldian erlijioari buruzkoak ezagutzen baikenizkion.

Liburuko hamahiru hauetatik hiru ezagunak genituen lehendik ere; hain zuzen, Tene Mujika Lehiaketan egile debarraren ipuin onenaren saria eskuratu eta lehiaketaren liburuan argitaratuak: “Aztia”, “Matxalenen komeriak” eta “Frentetik”.

Ipuinak garai ezberdinetakoak ditugu: badira orain 25 urte baino atzeragokoak, baina gehientsuenak hala ere azken dozena erdi urte honetakoak. Denboran bezalaxe, gaietan eta giroetan ere, aniztasuna da liburuaren ezaugarri nabarmena: bere bi bizileku nagusiei men eginaz, badira lehorrekoak eta itsasokoak, badira gaur egun edo gerra garaian kokatuak eta bai eta denbora mitiko batekoak ere, badira asmakizun eta amets kutsukoak batetik, eta bestetik benetako gertaeren kontaera diruditenak.

Desberdintasun guzti horien aldean, badira liburuko ipuinei batasuna ematen saiatzen diren bereizgarriak ere, hala nola, zenbait partetan egituratzea, edo irakaspen moduko ondorioak ateratzeko bidea eskaintzea. Ez baita alferrik apaiz guzti horien aita.