Peaceful soldadua / Michael Morpurgo (Mirentxu Larrañaga) / Alberdania, 2006

Benetako etsaiak Javier Rojo / El Correo, 2007-05-09

Michael Morpurgoren “Peaceful soldadua” izenburuko eleberri antimilitarista agertu zaigu euskarazko bertsioan. Bertan kontatzen da nola soldadu batek, Lehen Munduko Gerran mendebaldeko fronteko lubakietan infernuaren modalitate berriak ezagutu zituen soldadu britainiar batek, ekartzen duen gogora bere ordura arteko bizitza. Une kritiko batean dago (ez dut azalduko zergatik), eta une kritiko horrek eskaintzen dion talaiatik pertsonaia gai da bizitza osoa ulertzeko. Izan ere, gerrara joan arte eraman duen bizitza, Lehenengo Mundu Gerran soldadu arrunt moduan aritu ziren beste britainiar askoren bizitzaren antzekoa da. Beti pobrezian, miseriaren mugan, jauntxo baten nahikerien menpean askotan, hamasei urte dituenean boluntario alistatzen da gerrara joateko anaiarekin batera. Boluntarioa, ezinbestez. Lubakietan ulertuko du gerretan ez dagoela ezer miresgarririk. Nagusiek soldaduak tratatzen dituzte zaborra izango balira bezala. Eta soldaduek nagusi hauetan, eta ez bestaldeko lubakietan dauden soldadu alemanen artean, benetako etsaiak aurkituko dituzte. Interesgarria izanda ere, dena guztiz argi utzi nahian, planteamenduetan pixka bat sinplista gerta daiteke liburua.