susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ihesaldia | Hariak »

Homo Faber / Max Frisch (Joxe Austin Arrieta) / Elkar, 2001

Patuak uste ez garena izatera eraman gaitzake Mikel Asurmendi / Irunero, 2002-02

Nobela gotorra ekarri dugu aldi honetan: Homo Faber. 1957. urtean idatzia. Beraz, laster mende erdi bat joan da Max Frisch idazle suitzarrak idatzi zuela. XX. mendeko alegoria bikaina eskaintzen duen eleberria dugu Homo Faber. Ez da egungo garaikoa, baina egungo garaia eta testuinguruaz gaztigatzen digun literatur obra bikaina da berau.

Egungo gizabanakook komunikatzeko dugun ezintasunak, gainera etorri zaigun aurrerapen etengabearen onurak, baita aurrerapen beraren oinazeak gure baitan sorrarazi duten krisiaren lekukotasun krudela da Max Frischen eleberria.

Mundu honen globalizazio ekonomikoaren arrastoan jartzen gaitu eleberriak. Walter Faber, ingeniaria, New York-etik Greziara, Europako mendebaldetik Guatemalara ibili dabil bere lana dela-eta; gure planetan dabil jira-biraka. Izaera praktikoa eta pragmatikoa duen pertsona da Homo Faber, bere abizenak dioen bezala. Abizenak, alemaneraz, gailua edo tresna adierazten baitu. Beraz, gizon tresnatutzat jo dezakegu bera. Ez da erromantiko horietako bat, ezta urrik ere.

Bizitzak, alabaina, ezuste galanta emango dio. Sekula pentsa zezakeen abentura bat suertatzen zaio. Izan ere, kasualitateak eta patuak gizakion ibilbidea marka dezake une batez. Halabeharrak uste ez dugun esperientzia bizitzera eraman gaitzake. Eta, orduan, gure usteak ustelak bihur daitezke, eta gure aburua, bat izan ezik, bat baino gehiago bihurtu ere bai. Horra, eleberri honen nondik norakoa. Hori guztia, eta Joxe Austin Arrietaren euskara paregabean.