susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bikote harremanak | Aspaldiko berritzailea »

Ohe bat ozeanoaren erdian / Mikel Hernandez Abaitua / Erein, 2001

Ihesaldia Javier Rojo / El Correo, 2002-01-30

Ezin dugu esan Mikel Hernández Abaituak gehiegi idazten duenik. Argitaratu behintzat ez du asko egiten. Baina hala suertatzen denean, liburu interesgarriak eskaintzeko ohitura izaten du. Honetan “Ohe bat ozeanoren erdian” izeneko nobela irakur dezakegu. Euskal Herriko egoeran oinarrituta, idazleak kontatzen digu nola protagonistak Euskal Herritik Bolognara joatea erabaki duen, hemen gertatzen denarekin nazkatuta. Bidaia fisikoak barne bidaiarako eta hausnarketarako aukera ematen du. Pentsamenduak, oroitzapenak eta bidaiarekin lotutako gertaera txikiak batera agertzen dira, Euskal Herriko egoeraren aurrean lehenengo pertsonan etsipenez beterik mintzo den protagonistaren buruan.

Izan ere, bidaia hau itotzen duen mundu batetik egindako ihesaldia baino ez da. Batzuetan, ez dakit irakurlearekiko konplizitatea bilatzeko, egiten diren aipamen batzuek (errealitatetik hartutako gertaera oso ezagunak, baina kasu honetan protagonistarekin lotuta baleude bezala azalduak) nabarmenegiak dirudite. Bestaldetik, atal batzuk ezagunak izan dakizkioke irakurleari, istorio solte moduan agertu baitziren Ahotsak izeneko liburuxka batean. Euskal Herriko egoerak sortzen duen nekaduraren ondorioz egindako liburua da, azken finean.