susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Oroimenaren betaurrekoak | Ihesaldia »

Bi bihotz, hilobi bat / Ramon Saizarbitoria / Erein, 2001

Bikote harremanak Javier Rojo / El Correo, 2002-01-23

Erein argitaletxeak, antza, erabaki du Ramon Saizarbitoriaren “Gorde nazazu lurpean” liburu miresgarrian agertu ziren narrazio guztiak banan-banan liburu soltearen formatuan argitaratzea. Izan ere, “Bi bihotz, hilobi bat” era honetan agertzen den hirugarren liburua dela uste dut. Istorio honetan Saizarbitoriak senar-emazteen arteko gatazkei buruzko ikuspegi dibertigarria eskaintzen digu. Alde honetatik liburua umoretsua da, sarkasmoz betea askotan, gizon-emakumeen arteko harreman zailen berri emateko itxura barregarria erabiltzen duena. Baina azal honen azpian, mingostasuna dago uneoro kontakizunean agertzeko prest. Istorio honetan agertzen diren pertsonaiek, elkarrekin bizi arren, elkar ulertzeko ezintasun erabatekoa dute, mundu banatan aurkituko bailiran. Honekin batera, idazleak ez du aukera galtzen gure gizartean noizean behin agertzen diren zenbait jokamolderen kritika ere egiteko. Hor erakusten ditu, adibidez, euskaldun batzuek deiturak direla-eta dituzten konplexu bitxiak, euskalduntasunaren funtsa horretan baizik ez balego bezala, edo heriotzaren inguruan askotan antolatzen diren parafernalia arranditsuak. Liburua, edonondik ikusita ere, ezinbestekoa da, umorea eta sakontasuna gutxik bezala uztartzen jakin du-eta.