Gerrako pilotu / Antoine Saint-Exupéry (Josu Zabaleta) / Elkar / Alberdania, 2003

Frantzia bihotzean A. de Amezaga / Bilbao, 2003-12

Irakurle potentzialak Antoine Saint-Exupéry (19001944) Le petit prince edo Printze txikia —euskarazko itzulpenean— liburuaren autore gisa bakarrik ezagutzen du. Egia da ospe handiena eman ziona dela eta XX. mendeko liburu famatuenetariko bat bihurtu zela, baina ez da frantses idazle eta hegazkin pilotu honek idatzitako bakarra (eskerrak). Gerrako pilotu, Printze txikia baino urte bat lehenago argitaratu zen, 1942an, Frantzian (Gallimard) eta Ingalaterran (Reywal & Hitchcock) aldi bezean, II. Gerra Mundialaren ekuadorrean, autore honen bizitzarekin bukatuko zuen guda gogor hartan —behin eta berriro idatzi denez, Saint-Exupéry gerrako hegaldi batean hil zen, alemaniar hegazkin batek itsasora botata—. Literatura Unibertsala bildumaren liburu berri hau Saint-Exupéry beraren historia da, bere esperientzia profesionala eta pertsonala isladatuko duelako, bere bizipenak, gogoetak, esperantzak, urduriak… Narrazio bizi eta askotan indartsu honen bidez irakurleak garai eta nazio baten borroka eta sufrimenduaren lekuko izango da. Gerrako pilotu-ren euskaratzailea Josu Zabaleta dugu, Lur Hiztegi Entziklopedikoaren zuzendaria eta XX. mendeko beste autore ospetsuen (Maupassant, Sciascia eta Pasolini, besteak beste) lanen itzultzailea. “Gizatasunaren bilaketa aldezten du Saint-Exupéryk” eta “kontaketa guztiaren oinarri, Frantziaren ideia: Frantzia da frantsesen balio guztien, frantsesen gizatasunaren mamia eta erroa”, adierazten du hitzaurrean. Hau guztia justifikatzeko jakinaraziko digu liburua gerra ondoko Frantziako hezkuntzan irakurgaia izan dela eta milioika ale kaleratu direla. Historiako sasoi latzak ezin dira ahaztu; berriro errepika ez daitezen.