« Eleberriari buruz | Iparraldean zehar »

Hodei berdeak / Jon Alonso / Susa, 2003

Hodei berdeak Xabier Gantzarain / The Balde, 2003-09

Batek ez daki zergatik irakurtzen duen. Ez daki zergatik atsegin duen denbora-pasarako uste den zeregin hori. Zergatik ematen dituen orduak paperezko munduetan. Baina irudipena du, paperezko mundu horiek badutela zerikusirik errealitatea deitzen diogun egunarokotasun bihurri honekin.

Batek atsegin du Jon Alonso, fikzioaren eta errealitatearen arteko soka tenkatu eta gero gainean ibiltzen dakielako. Nobela berean pertsonak (izen ezagunak) eta pertsonaiak (pertsona ezezagunak) nahasten asmatzen duelako.

Batek hartzen du Hodei berdeak, eta narratzaileek 60. hamarkadako Iruñean zehar eramaten dute. Ezagutzen ez zituen giroak ikusten hasten da. Garai hartan CIAko agente baten bizitza nolakoa izan zitekeen irudika dezake, edo OPUSeko batena. Irudika dezake nolakoa zen abertzaleen borroka, eta baita abertzaleen artekoa ere.

Batek irakurtzen du Hodei berdeak, eta inoiz egon ez den leku batetik itzuliko balitz bezala sentitzen da. Eta bere buruaz gehiago dakiela. Beste batek beste zerbait aurki dezake liburu honetan.