« Xelebrekerien erresuma | Sagarrak heltzen ari direnean »

Itoko dira berriak / Karlos Linazasoro / Alberdania, 2003

Umore beltza Aritz Gorrotxategi / El Diario Vasco, 2003-06-22

Aste honetan, Karlos Linazasororen liburu bat hartuko dut hizpide. Alberdania argitaletxeak berriki kaleratu duen Itoko dira berriak. Narrazio luze edo nobela labur honek, sailkatzaile profesionalek azter dezatela gai hau, B. hirian jazotako pasadizo bat du oinarri. Itsasoan itotzen ari den pertsona bat. Aitzakia honen inguruan harilkatzen du idazleak, elkarrizketa ironiko eta surrealistez baliatuz, satira bikain hau.

Karlos bera dugu protagonista, hondartzan dauden herrialde ezberdinetako jubilatuekin batera. Teman hasiko zaizkigu denak, itotzen ari den pertsona hori nola salbatuko. Zoritxarrez, inork ez daki igerian. Eta, noski, horrek salbamendu operazioa zailtzen du. Molde surrealistetatik abiatuz, Groucho Marx gogoan, pertsonaia bakoitzaren neura eta patologiak ezagutuko ditugu. Neurri handi batean, horixe baikara gizakiak, neura eta patologien aberri. Egoera estu baten aurrean, arezko gazteluak eraikitzeko hautua egiten baitu gizakiak. Jolasaren pedagogia lizuna. Komunikazio mugikorraren aroa. Hurbil egonda ere, urrutitik mintzo den gizartea.