susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Ikustekoa | Arratseko ahotsak ozen »

Kandinskyren tradizioa / Ramon Saizarbitoria / Erein, 2003

Lehen amodioa Javier Rojo / El Correo, 2003-05-21

Ramon Saizarbitoriak bere azken liburuari “Kandinskyren tradizioa” jarri dio izenburutzat, margolari errusiarraren emazteak kontatzen omen duen anekdota batean oinarrituta. Liburu txiki honek (laurogei orrialde inguru baino ez ditu) euskal idazleak azken urteotan jarraitu duen ibilbidean aldaketa bitxi bat erakutsi du: itxuraz behintzat, irakurle gazteentzako testu baten aurrean gaudela ematen du.

Izan ere, istorioaren protagonista lehen pertsonan mintzo den neska nerabea da eta liburuan, gainera, bere lehenengo amodioaren kontaera egiten zaio irakurleari, ametsezkoaren eta errealitatezkoaren arteko kontrajarpenaren bidez. Hau da, liburuak gazte literaturean aurki daitekeen topikorik nagusienetako batean dauzka bere erroak. Baina berehala konturatuko da irakurlea ez dagoela planteamendu horiekin idazten diren ohiko liburuetako baten aurrean. Gehiegizko sinplifikazioak eta dena azaldu beharra alde batera utzita, Saizarbitoriak ironiaren inguruan antolatu du bere idazlana, xehetasunak eta zeharkako aipamenak ulertzeko gai den irakurlea gogoan.

Liburu hau, azken urteotan idatzi dituen beste lan batzuekin konparatuta, divertimentotzat har daiteke. Hala ere, idazleak ez dio ukorik egin benetako literatura egiteari.