susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Emakumea eta egiletasuna | Hizketan irautea »

Mari-mutil handi baten bluesa / Leslie Feinberg (Fermin Zabaltza) / Katakrak, 2018

Bizirik irauteko borrokatu Onintza Irureta Azkune / argia.eus, 2019-08-13

Jess Goldberg fikziozko pertsonaia da, baina nekeza da eleberria asmatutako kontakizun moduan irakurtzea; errealegia baita. 1960-70 hamarkadatan kokatuta, AEBetako New Yorkekoa da Goldberg. Gure pertsonaia mari-mutila da, lesbiana, transgeneroa. Bere buruari etengabe galdetuko dio emakumea ala gizona den. Fabrikako langilea ere bada. Asmatutako pertsonaia hezur-haragizko irudikatzea oso erraza da, garai bateko bazterreko gorputzen bizi nahiaren erretratu zehatza baita.

Goldbergek lotsa, ikara eta mina pairatuko ditu bere haragitan. Ez da beldurraren beldurrez zimurtuko ordea, borrokari eutsiko dio taldean, identitate ez normatiboek bat egingo dute bizirik jarraitzeko. Indarkeria handiko giroa azaltzen du Feinberg egileak, transfobia, homofobia, arrazakeria eta klase borroka gurutzatzen dira. Gaur bizi dugunetik ez dago oso urrun.