« Herriaren hatsa | Garai txarrak ipuinetarako »

Ekialdeko mamuak / Jon Arretxe / Elkar, 2002

Turkiatik Iranera Javier Rojo / El Correo, 2003-04-23

Jon Arretxe euskal literaturan best-seller fenomenoari hurbilen dagokeen idazlearen adibidetzat har daiteke. Bi oinarritan eraikitzen da bere literatura: ikasleen bizitza utzi nahi ez duten pertsonaia batzuen inguruan gauzatutako narrazio barregarriak, euskara ikasten ari direnen artean izugarrizko arrakasta daukatenak; eta bidaia liburuak. Bigarren arlo honetako da “Ekialdeko mamuak” izeneko narrazio hau, eta azken aste hauetan munduak ezagutu duen gerra ikusita, are interes handiagoa har dezake liburuak. Izan ere, bertan kontatzen da nola bidaiaria Turkiatik Iranera doan bizikletaz, irailaren 11ko atentatuak gertatu eta hilabete batera. Gertakari hauen aurrean eta Ekialdean zegoen egoera gatazkatsuan (bidaia Afganistango gerra pil-pilean zegoenean burutu zen) pixka bat beldurtuta, bidaiaria eskualde horretatik bizikletaz ibiltzeak suposatzen duen abentura txikian murgilduta dago. Egia esan, ez zaio gauza berezirik gertatzen. Eta honek ere balio berezi bat ematen dio liburuari, egiazkotasunarena alegia. Jendearekiko harremanak, mugak pasatzeko trikimailu txikiak, eguneroko bizitzako abenturak; honelakoak kontatzen dira. Gai honekin eta topikoak gainditzeko asmoarekin liburu aholkugarria sortu du Arretxek.