susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Literatura eta poesia | Zorion perfektua »

Mila gau eta bat gehiago / Anonimoa (Patxi Zubizarreta) / Erein, 2002

Ipuinen magia Javier Rojo / El Correo, 2003-02-26

Patxi Zubizarretak behin baino gehiagotan erakutsi du ekialdeko literatura gogoko duela, eta orain bere eskutik datorkigun liburu hau ere horren frogatzat har daiteke. Izan ere, “Mila gau eta bat gehiago” ipuin bildumaren aukera eta bertsioa eskaintzen digu Zubizarretak. Honek esan nahi du, jakina, orrialde hauetan ez direla agertzen jatorrizkoan azaltzen diren istorio guztiak, baldin eta hitz hauek (jatorrizkoari buruzko aipamenaz ari naiz) zentzurik badute. Dena dela, ipuinik ezagunenak agertzen dira. Adibidez, eta edonoren oroimenean dauden istoriak bakarrik gororatzearren, Zubizarretaren antologia honetan Sinbaden bidaia batzuen berri izango dugu, Aladin eta bere argiontzi miresgarriaren gorabeherak gogoratuko ditugu edota Ali Baba eta berrogei lapurren leize-zuloan sartu ahalko gara. Baina ez dugu ahaztu behar, abenturazko literaturaren eredutzat har daitezkeen istorio hauen ondoan, “Mila gau eta bat gehiago”-n ipuin erotikoak ere badaudela eta horietako batzuk agertzen dira antologian, hala nola Zerezaderen beraren istorioa, honetan oinarritzen baita liburu osoaren planteamendua. Istorioen magia dakar liburu honek, ipuin on bat irakurtzeak edo entzuteak daukan lilura. Klasikoak hilezkorrak badira, hauxe da bat, dudarik gabe.