susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« “Elorri” | “Bide-giroak” »

Euskeraren berri onak / Agustin Kardaberaz / Auspoa, 1964

Euskeraren berri onak Luis Mitxelena / Egan, 1964

Aita Cardaberaz hiztun erraz eta ugari agertzen zaigu utzi zizkigun liburu guzietan. Ez zen hain garbia edo, dirudienez, garbitasunak ez zion Aita Mendibururi adina axola.

Liburu horien artean, ordea, bat da berezia eta berezitasun hori dela bide arras ezaguna: Euskeraren berri onak deritzana eta Auspoak orain berriro, laugarren aldiz, argitara duena.

Gaia du berezia liburu horrek, gainerako guztiak erlijiozkoak baitira eta hau bakarrik bestelakoa, euskararen berri emateko eta euskaraz ongi mintzatzeko eta idazteko egina. Eta horri eskerrak franko gauza ikas dezakegu gure hizkuntzaren garai hartako izaeraz eta egoeraz.

Liburu horrekin batean, lehen argitaraldian 63 orrialde besterik ez zituen liburuxka baita, beste bat argitara du Auspoak: Aita Agustin Cardaberaz Jaincoaren serbitzari andiaren berri laburrac izenarekin, apaiz batec, euskaraz eman zuena Durangon, Elosurenean, 1908garren urtean. Ederki baino ederkiago dator, beraz, Cardaberazen obrarik ezagunenetariko honekin batean egilearen bizitzaren berri ere ikas dezagun. Ez baitugu haren lanik ulertuko zer nolako gogoak eta asmoak eragiten zion ez badakigu.