susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« “Elorri” | “Bide-giroak” »

Senpere-n gertatua / Piarres Larzabal / Auspoa, 1964

Senpere-n gertatua Luis Mitxelena / Egan, 1964

Larzabal apaiz jaunaren izena ongi ezaguna da gure artean, eta merezi onez ezaguna, bere teatro lanei eskerrak. Bere antzerkiak, besterenak ez bezala, herrikoiak eta ikasiak baitira, jende landu eta jende arruntarentzat eginak.

Maiz ikusiak eta txalotuak izan dira, bai Bidasoaz alde honetako euskaldunen artean ere, bere lanak, eta horietan ezagunenetako bat da noski orain Auspoak argitara dakarren Senpere-n gertatua deritzan hau. Suspense gehiegirik gabeko gizon-hiltzea, lehen hitzek salatzen baitute egilea, baina arimen barrunbean ekaitz eta zurrunbiloak sortzen dituena.

Gauza jakina da, sarri esaten ez bada ere, Larzabal deritzan langile purrukatu hori zabar xamarra dela, zabarra eta utzia, bere teatrolanak inprentara eramaten. Zabarkeriaren erremedioa orain aurkitu du, horratik, horrenbeste euskal ondasun biltzen eta bildu ahala barreiatzen ari zaigun Auspoa-n lehen ere Iru ziren eta Herriko bozak argitara zituen bilduman. Ikus EGAN 1962, 306-307 orr.

Sempere’n gertatua Lapurdiko eta Gipuzkoako euskeraz agertu da, eta gipuzkeraz moldatu duena Aita Luis Villasante Euskaltzaindikoa dugu. Aurki ote daiteke antolatzaile hoberik?