susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Mozorroa erantzi | Fikzioa, hemen eta orain »

Ezinbestean / Unai Baztarrika / Erein, 2014

Galera sentimendua Javier Rojo / El Correo, 2014-06-28

Unai Baztarrikak poema liburu batekin egin du bere aurkezpena euskal literaturaren alorrean, liburuen argitarapenei dagokienez behintzat. Poema liburu honek “Ezinbestean” du izenburua eta “Blas de Otero-Bilbo Uria” poesia lehiaketan irabazlea izan zen 2013ko deialdian. Idazlan honetan agertzen diren poemak irakurtzen dituena berehala konturatuko da sentimendu nagusi batek zeharkatzen duela alderik alde liburua. Galera-sentimendua zehaztugabea da, gehienetan ez da gauza zehatz bati loturik agertzen. Poemetan “ni” batekin aurkezten zaigun subjektuak denboraren igarotzearekin batera zerbait galdu duela sentitzen du, zerbait hori lausoturik gelditzen delarik. Beraz, galeraren sentimendu honen atzean, jarrera existentzial baten presentzia ikusi beharko genuke, bizitzaren ezinbesteko baldintza baita denbora pasatu ahala zerbait uzten dela atzean. Bestalde, poema liburu honetan garrantzitsua da oso komunikazioaren inguruan egiten den hausnarketa. Bi modutan agertzen da gai hau Unai Baztarrikaren poemetan. Alde batetik komunikazioaren izaera bikoitza aurkezten zaigu, esan-isildu kontrajarpenaren inguruan antolatua dagoena. Eta horrekin batera, hitzaren izaera bikoitza agertzen zaigu, hitzek komunikatzeko balio baitute, baina paradoxaz hitzak ere batzuetan esentzialenera hurbiltzeko oztopo moduan aurkeztu daitezke.

Poeta berri bat, nahiko gaztea bestalde, eta lehiaketa inportante batean epaimahaiaren oniritzia jaso duena, datu hauekin aurreikus litekeena baieztatzen da irakurketan: Poeta interesgarri bat agertzen zaigu idazlan honetan, poesian topikoak diruditen osagai batzuetan oinarrituta bere ahots propioa bilatzen ari dena.