susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Alkasoroko Benta | Lan irekia »

Damutzen ez direnak / Itxaso Araque / Elkar, 2012

Damutzen ez direnak Nerea Gallastegi / hirinet.net, 2014-01-15

Hiru pertsonaia: Stuart, Naroa eta Andreas. Hiru lanbide, hiru bizimoduren adierazle: exekutiboa, kazetaria eta arkitektoa. Hirurak hogeita hamar urteren bueltan, bizitzako erabakirik garrantzitsuenak hartuak izaten diren adinean, bizimodua bideratuta edo erdi-bideratuta izaten den bizitzako aroan.

Itxuraz, loturarik gabeko hiru istorio dira, edota hiru bidaia: Londonetik jaioterrira joango da Stuart; Naroa, Bartzelonatik abiatuta, Donostian, Hendaian nahiz Milanen izango da; Andreas Berlingo kaleetan barna ibiliko da, hiriz aldatu gabe. Bidaia ez baita soilik fisikoa, eta kasu honetan, hiru protagonistek egingo dute barne ibilbide berbera: orainaldiko kezkak, arazoak, larriminak gainditzen saiatzeko, iraganera begira jarriko dira, eta une horretara arteko erabakiak jarriko dituzte zalantzan.

Zalantza baita aurrera egiteko modu bakarra. Edo lehenengo urratsa, behintzat. Izan ere, zalantzak sortutako ziurgabetasunak damua ekarri ohi du berekin, eta damutasunak etorkizuneko erabakiak baldintzatzen ditu: egindako akatsak konponezinak direnez gero, bizitzak jarritako tranpa berberean ez erortzen saiatzen gara, bestelako erabakiak hartzen, beste bide batetik jotzen, ala ez?