susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Siberian barrena | Zalaparta isila »

Sagarroiak / Sonia Gonzalez / Euskaltzaindia-BBK, 2002

Munduaren neurria Javier Rojo / El Correo, 2002-08-28

Sonia Gonzalezek, “Sumendi” ezizenez, Sagarroiak izeneko poema liburua plazaratu berria du. Liburu honek iazko Felipe Arrese Beitia saria irabazi zuen. Liburu honetako poema batzuk narratiboak dira. Hau da: poesia izateari utzi gabe, istorio bat kontatzeko asmoa dute, hari narratibo bati jarraituz. Bestetan, narrazioak barik, deskripzio subjektiboek osatzen dute poemaren muina. Edonola ere, itxura guztien arabera autobiografikoak ematen duten osagaiez horniturik agertzen zaigu hemengo poesia. Alde honetatik, nabarmena da “Ni”ak, lehenengo pertsona poetikoak alegia, duen presentzia. Nagusi baita alderdi guztietan, ausentziaz eta gabeziz betetako mundu paradoxikoa ulertzeko ahaleginetan murgilduta, mingostasun puntu batez, azken finean, mundua ulertzerik ba ote dagoen ez dakielako. Ez dira falta, bestaldetik, maitasunari buruzko poemak ere, askotan erotismo nabarmena adierazten dutenak. Eta ausentzia eta maitasuna biak bat eginda, amodioa amaitu ondoren sortzen den hutsunea ere erakusten zaigu zenbaitetan, ironiaz betetako begirada baten pean. Ohiko bideetatik dabilen poesia dugu liburu honetakoa. Dudarik gabe, duintasunez eginda dago, baina betiko gaien gaineko bariazioak izateko itxuraren zama jasan behar du.