« Trantsiziotik emantzipaziora | Hodeien adorea »

Bizkartzainaren lehentasunak / Iñaki Irasizabal / Elkar, 2013

Bizkartzainaren lehentasunak I.E. / Aizu!, 2013-07

Iñaki Irasizabalek aurreko liburuetan ere landu izan duen nobela beltzaren generoari heldu dio bere azken eleberrian. Haatik, aurrekoetan ez bezala, euskal politikan “sartu” eta oso testuinguru zehatzean kokatu du istorioa: 2011ko uda Bilbon, ETAk armak behin betiko utziko dituela iragarri baino hilabete batzuk lehenago. Martin Goena da protagonista nagusia, garai batean erakundeko militante armatua izana. Kartzelan egon ostean, zinpeko guarda dabil orain, diruz betetako furgonetak zaintzen. Halako batean, ETAren zuzendaritzan poliziak infiltratuta eduki duen satorra zaintzeko eskaria jasoko du Barne Sailetik.

Fikzio hutsa. Fikziotzat hartu behar da kontakizun hau, eta, hala hartuz gero, beste helbururik gabe, irakurketa arina eta entretenigarria eskaintzen digu Irasizabalek. Izan ere, testuingurua hain zehatza denez eta euskal irakurlearentzat hain ezaguna, oso sinesgaitzak, sinestezinak, suertatzen dira liburuko pasarte asko. Halere, egileak berak aitortu du testuan agertzen diren ekintza zein egoera guztiak asmatuak direla: “Pertsonaiak ere ez dira ezeren ordezkari edo isla”. Ondorioz, udako arratsalde entretenitu bat igarotzeko asmoz irakurtzen bada nobela, egokia da Irasizabalen proposamen berria: laburra, elkarrizketa ugari, idazkera arin eta erraza…