susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Comala argitara | Basajaun behatzailea »

Mugaren ariketa / Ander Iturriotz / Elkar, 2002

Jatorrietara Javier Rojo / El Correo, 2002-07-17

Prosaz datzita egon arren, poesia bide da Ander Iturriotzek idatzitako “Mugaren ariketa” izeneko liburu hau. Poesiari zuzendutako bilduma baten agertu da behintzat. Eman dezagun, beraz, prosaz idatzitako poema liburu baten aurrean gaudela. Iturriotzek bere liburu honetan gure kulturan arrazionalismoak suposatu duen guztia alde batera utzi eta irrazionalismo esentzialaren balioak erakusti nahi ditu. Pentsamendu logikoaren ordez, pentsamendu mitikoa dei litekeena agertzen da, beraz, prosazko poema horietan, pentsamendu mitiko honek jatorrira hurbiltzen gaituelakoan. Telebistan agertzen den iragarki batean esandakoa pixka bat egokituz eta hermeneutei hainbeste gustatzen zaizkien hitz jokuan eginez, jatorria eta jatorra gauza bat eta bakarra dira liburu honetan. Gauzak honela, paralelismoak eta pilaketak dira gehien erabiltzen diren baliabideak, eta honetan idazlea guztiz koherentea dela esan behar: arrazionalismoak bideratuko pentsamendurik gabe, itxuraren antzekotasuna eta elkarren ondoan egotea dira elementuen arteko harremanak marka ditzaketenak. Eta jatorrira itzultzeko asmo honetan, naturaleza jainkoaren lekua bete beharrean dago, jainkoaren faltak sortzen duen hutsunea jasan ezinezkoa baita halako planteamendu batean.