susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Gogo biziz bizitzari eta poesiari | Bost idazle »

Baina bihotzak dio / Xabier Montoia / Elkar, 2002

Herritik kanpora Javier Rojo / El Correo, 2002-06-19

Xabier Montoiak “Baina bihotzak dio” izeneko narrazio liburua argitaratu berri du. Hamahiru narraziok osatzen dute liburua eta oso desberdinak diren arren, denek planteamentu beraren gainean daude eraikita. Narrazio guztietan protagonistak Euskal Herritik urrun daude eta kasu gehienetan urrun egote horrek mindura (herrimin) berezi bat pizten die. Liburuaren izenburuak aipatzen duen Iparragirreren kantuan esaten denaren ildotik, pertsonaia hauek Euskal Herria dute gogoan eta hona bueltatzeko ametsak nolabait biziarazten ditu. Arrazoi desberdinak izan dira beste lurralde batzuetara eraman dituztenak. Batzuetan, familia joan delako, pertsonaia beste herrietara joan beharrean aurkitu da, honen kontra ezer egiteko aukerarik gabe. Noizean behin, erbesteratuak edo kartzelaratuak dira kanpoan daudenak. Eta kasuren batean ihesaldi intelektual baten aurrean gaudela dirudi. Istorioak desberdinak izanik, protagonistak ere denetarikoak dira. Alde honetatik, idazleak interes berezi bat erakutsi du norberari dagokion izaera hizkeran ere islatzeko. Honetan lekua da gehien nabarmentzen dena, pertsonaien karakterizazio horietarako batez ere euskalkiez baliatu baita.