« Des egiten | Azeituna proletario bat »

Twist / Harkaitz Cano / Susa, 2011

Twist Lurdes Imaz / Aizu!, 2012-04

Pentsatu eta esaten ez diren gauzen inguruko gogoetez josi du Harkaitz Canok (Lasarte, 1975) bere laugarren nobela. 80. hamarkadako ETAren kontrako gerra zikinean kokatu du istorioa, eta maitasunaz, traizioaz, engainuaz eta batez ere adiskidetasunaz aritzen zaigu gustura irakurtzen den laurehun orrialdetik gorako lan ausart honetan.

Diego Lazkano da nobelaren protagonista, baina Xabier Soto eta Kepa Zeberio lagunen mamua nabari da liburu osoan zehar. Soto eta Zeberio lurpean daude; bahitu, torturatu eta erailak izan baitziren, Lazkanok torturapean salatu zituelako. Horrek markatuko du handik aurrerako Diegoren bizitza osoa, lagunen ordez bizi beharko balu bezala.

Indartsu hasten da nobela: Soto eta Zeberio lurpean daude, eta karearekin nola estaltzen dituzten kontatzen diote irakurleari, bigarren pertsonan. Hortik hasita, bizirik dagoen Diego Lazkanoren historia ezagutuko dugu: haren idazle karrera, maitasun erlazioak, familiarekiko gorabeherak, epaiketa prestatzeko lanak eta gainerakoak.

Lagunak desagertu aurretiko pasarteak nahasiko dira kontakizunean: mugaz bestalde elkarrekin bizitako momentuak, bahitua zaintzen egindako txandak… Batzuk eta besteak uztartuz egiten du aurrera nobelak, indarrik galdu gabe eta osotasun borobila lortuz. Irakurtzea merezi duen lan ederra zinez.