susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ahots propioaren bila | Zamaontzia »

Atakak / Hasier Larretxea / Alberdania, 2011

Pasabidea Juan Ramon Makuso / El Diario Vasco, 2011-11-18

Badira ibilbideetan, soroetan, belardietan, larreetan, piketeak, eta hauekin osatuak, burdin hesiak. Burdin hesiek itxi egiten dituzte eremuak, zelaiak, bereizteko norberaren lurrak, baina tarteka, burdin hesi hauetan atakak ipintzen dira, sartu-atera ekintza burutu ahal izateko. Hasier Larretxeak bere hirugarren poesi liburua argitaratu du, ‘Atakak’ izenburupean. Liburuak lau atal ditu, “Eraikinen hondarrekin hesitzen”, “Hedatutako arropen tolesturak”, “Argitasunaren iraunkortasunari” eta “Ahanzturaren memoriaren isil-gordeka”. Eta atalak ez dira kasualitate hutsak, badira ere atakak, sartu-ateratzeko. Liburuari atal hauek ematen diote batasun bat, nahiz eta bere baitan, hasieran behintzat, atalek halako haustura edo mozketa bat suposatzen duten. Liburu hau Larretxearen poetikan bai suposatzen duela aurrekoa atzean uztea, bai gaiaren aldetik eta baita, funtsean poesia beraren aldetik. Oraingo honetan poesia sakon baten aurrean gaude, forma eta eduki aldetik, aforismo, haiku eta pentsamendu liriko bat azaltzen baita, “Kazkarabarra ari du / goizalbaren betazaletan. / Zure bizitzaren parabrisean”. Poemetan agertzen da lekukotasun geografiko bat, ez dut esango nostalgia bat, baina bai poetaren lurraldearen gorazarre bat, hau adibidez liburuaren bere bigarren atalean nabarmentzen da. “Bat ezin da herrixkan sendatu, / alkohola aukera bakarra denean. / Amak ez du gogoan argazkirik ote zen, non egonen den”. Liburu honetan esan daiteke Larretxea berri beten aurrean gaudela, beste estetika bat eraiki nahian dabilen poeta, hasierako liburuek nolabait gordetzen baitzuten poesi sozialerako keinu bat, eta orain poetak, gauzen zerizana kontutan hartu duela esango nuke. Gustatuko zaizu irakurle.