Itzalaren ñabarduretan / Pello Otxoteko / Hiria, 2001

Izatearen funtsa Javier Rojo / El Correo, 2002-05-29

“Itzalaren ñabarduretan” izeneko poema liburuan Pello Otxoteko Vaquerok bere kezka metafisikoak plazaratu nahi izan ditu. Izan ere, Pello Otxoteko izateaz eta honek funtsean esan nahi duenaz aritzen da filosofiaren mugetan dauden poesia itxurako testu hauetan. Batzuetan, kezka metafisiko hirriek poemetan gauzatzean poesia kotzeptistatik hurbil uzten ditu testuok, paradoxan oinarritutako hitz joku korapilatsuak ere sortu dituelarik. Poesia hau, beraz, pentsatzeko poesia dela esan daiteke, ez sentitzeko poesia, sentimenduak, izateaz aritzen
den ardura metafisiko horrek ukitzen ez dituen bitartean, bigarren planoan gelditzen baitira gehienetan. Eta, bestaldetik, izatearen funtsera jo nahi duen pentsamendua gauzatu nahirik, itxurak plantea dezakeen oztopoa ere gainditu beharrean aurkitu da idazlea. Gauzak honela, idazleak itxura horren atzean arakatu behar du egiara heltzeko, perzepzioak, Platon-en kobazuloaren mitoan bezala, alderik garrantzigabekoena baizik erakusten ez baitu. Hortik, bada, poesia honek duen itxura abstraktua. Eta, txanpon bakarraren beste aldea balitz bezala, izateaz arduratzen den poesia han ezin da, inola ere, kontrakoaz ahaztu: izkutan beti, ez-izatea baitago, heriotzaren beste izen bat datekeena.