« Ezkutukoak desestaliz | Azalaren oroimena »

Hitzak eta giltzak / Iñigo Aranbarri / Alberdania, 2001

Hitzak eta giltzak Castillo Suarez / Guaixe, 2001

Bitxia eta motza da Iñigo Aranbarriren Hitzak eta giltzak. Bertan hitzen eta oro har hizkuntzaren gainean hausnarketa egiten du. Izan ere, hiztegiak eta gramatikak hitzen eta esaldien bilduma hutsak baino gehiago badira.

Elementu horiek erabiltzen hasten garenean beren ibilbide propioa osatzen dute. Hala, esaldiak ez ditugu debalde erabiltzen. Gure karga politiko-sozial-ekonomiko-geografikoa eransten diegu. Esaldi horien hartzaileek ere balio erantsi hori indartu, moldatu edota ezaba dezakete.

Hitzen bidez jolas dezakegu; modu okerrean erabiltzen dira askotan eta euskalkia dela eta gaizki ulertuak suertatzen dira. Euskal hitzen arrastoak mundu zabalean daude; hala ere, Euskal Herrian bertan ez ditu bere abizenak euskal grafiaz idazten batek baino gehiagok.

Hizkuntzari buruz gogoeta egitea gustukoa dutenentzat interesgarria da Aranbarriren lantxoa. Horrez gain, zorrotza eta oso abertzalea da (abertzaleegia bakarren baten iritziz), anekdotario gisa idatzia dagoen gogoeta garratz hau.