susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Kikili eta Kokolo Chile-n | Poliki, poliki haizetan »

Euskara bizitzaren kenkan / J.A. Irigaray / Pamiela, 1988

Euskara bizitzaren kenkan Dabid Zuazalde / Argia, 1988-07-03

Badirudi piskanaka-piskanaka bizkortuz edo esnatuz doala saiakera gure artean. Azken aldian Sarrionandiaren liburua eta Irigarayren hau ditugu adibide. Joxe Angel, Irigaraitarren sagako nafar donostiartua, saio liburu batekin etorri zaigu orain, aurretik ipuinak eta poemak kaleratu ostean.

Gaia, euskara. Azpititulua: Orekaren mintzoa. Edukia: aintzin solasa, gibel solasa, eta tartean sei artikulu, bi erdaraz eta lau euskaraz. Azken dozena urte honetan idatziak. Pare bat, aldizkarietan-eta kaleratuak; gainerakoak gaurdaino argitaratugabeak.

Mamia? Hauxe baita garrantzizkoena. Euskararen defentsa egiten du, eta euskararentzako lurraldetasuna eskatzen. Honek duen berebiziko eragina jakintsu batek baino gehiagok aitatu izan du azken urteotan, nahiz agintariek ez entzunarena egin. Irigarayren ezaugarri bereizgarria da euskararen aldeko jarrera, jarrera etiko-filosofiko zabalago baten baitan sartzen duela: hizkuntza bat mundu osoaren ondasuna da, eta bere galtzea mundu osoarentzako galera; era berean, hizkuntza bat maitatzeak gainerako hiztun/hizkuntza guztiak maitatzea dakar, biziaren aldeko apostua da, eta bizitzaren oreka azpimarratzeko modua.

Humanismoa sasoi honetan modan ez badago ere, merezi du honelako argudioak entzuteak.