« Ijito nexka | Euskara bizitzaren kenkan »

Kikili eta Kokolo Chile-n / Xabier Gereño / Xabier Gereño, 1988

Kikili eta Kokolo Chile-n Dabid Zuazalde / Argia, 1988-06-26

Ohi duen adeitasunez, bere azken nobela (?) igorri digu Gereñok eta pozik asko eginen diogu aipamena. Azken aldian gehienbat espioitzakoak landu baditu ere, ez ditu bestelakoak alde batera utzi, eta hona hemen umorezko bat, orain urte batzuk Antonello Euskal Herrian harekin hasitako ildoari jarraiki.

Ez da bat ere erraza umorezko liburu bat egitea, eta txisteak pilatzearen poderioz barregarri barik, negargarri suertatzeko arriskua du eremu horretan abiatzen den orok. Aurreko batean kasualitatez topatu genuen liburu batean honako aipua: “Opera komiko baten azken ordubetea baino tristeagoa”.

Xabier Gereñok ere ezagutzen ditu zailtasunok, baina kementsu eta ausarta izaki ekin egin dio. Emaitza: Kikili eta Kokolo, bata luxe eta argala, bestea potolo eta txikarra. Herriko festa batzuetako imitatze saioaren ostean elkar ezagutu eta batetik bestera joango dira gero, Txilera eta, abenturetan.