susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Izan batekiko promesa betea | Ezaren guda »

Eguna hasteko olerkiak / Miren Billelabeitia / Pamiela, 2025

Gazteak eta poesiaren akuilua Paloma Rodriguez-Miñambres / El Diario Vasco, 2026-01-10

Miren Billelabeitiaren lan berriak badu loturarik bere aurrekoarekin. 2023an saiakerako Euskadi saria jaso zuen liburu hartan irakurketaz —eta irakurzaletasuna nola kutsatu gazteei— jarduten bazuen, oraingoan genero poetikoa haiengana gerturatzeko modua jorratzen du. Poesiak gazteentzat interesik ez duela dioen klitxearen aurrean, kontrakoa proposatzen digu: institutuko ikasleak poesiarekin hunkitzeko gai dira, beren bizi-kezkekin bat egiten duten poemak eskainiz gero. Alabaina, bitartekari lana eraginkortasunez burutzeko, irakasleak ezagutza eta sentsibilitatea behar ditu kanon poetikoari zein egungo poesiari buruz, ez baita soilik zer, baizik eta nola egin poesiarekiko gustua hezteko.

Modu zintzoan kontatzen du nondik sortu zitzaion poesia gelan lantzeko pizgarria: Nuccio Ordineren testu batek eta Angel Erroren Lerro etenak proiektu bat eratzera eraman zuten. Kontu handiz aukeratu zituen ikasleengan poesiarekiko garra eragin zezaketen irakurgaiak; lehenik, Kirmen Uribe; gero, Miren Agur Meabe. Zerrenda horri beste batzuk gehitu zizkion, ikasleen atzeraelikadurako iruzkinez osatu ahala.

Saiakeran poesiarekiko grina eta gozamena aise sumatzen ditugu, egilearen zalantzak eta gogoetak agerian, umiltasunez zerbait berria egiten ari delako ideia islatzen duelarik. Eta hunkigarria begitandu zait ikasleen erantzun eta erreakzioekin erakusten duen harridura, agian ez baitzuen espero hainbesteko arrakasta izatea. Errespetuz eta emozioz gomutatzen ditu 2020ko Covid garaian izandako azken eskolak, bereziki, ikasleek ozen irakurritako poemen grabazioak.

Gazteen poesiaren gainean interes urriaren aurreiritziak alboratuz, testigantza honi esker itxaropenerako leihoa zabaltzen du Billelabeitiak 2026ari hasiera emateko.