Idatz Lan guztiak (12 liburuki) / Manuel Lekuona / Gipuzkoako Foru Aldundia, 1988

Manuel Lekuona Dabid Zuazalde / Argia, 1988-05-29

Euskal kulturaren iazko galerarik handienetako bat, denok dakigunez, Manuel Lekuonaren heriotza izan zen. Gizonarekin batera bere lanak itzal ez daitezen, Gipuzkoako Diputazioak, bestelako omenaldien artean, haren lan guztiak argitaratzea erabaki zuen, eta dudarik gabe txalogarri deritzogu erabaki horri.

Bizitza osoan langile porrokatua izan zen, eta argi ikusten da bere emaitzaren neurriari erreparatzean. Hamabi liburuki, hamabi tomo mardul etorri zaizkigu erredakziora eta guzti hori laburbiltzen ezinezkoa dela jakinik, aipamen hutsean geratu behar.

Euskal kulturaren inguruan beti ere, interesgune desberdinak izan zituen don Manuelek beti, eta gai horien arabera sailkatu dira liburuak. Lehena, oiartzuar apezak goratzen lagundu zuen ahozko literaturaz. Hurrena arteari buruzkoa. Beste lau kondaira dutela mintzagai. Euskarari buruzko lanek beste bat hartzen dute, literatur sorkuntzak beste bat eta Gabon eta eliz kantek ere badute berea. “Azken Urratsak” izendatu azkenaurrekoa, eta azkenean berriz, gehigarri eta aurkibideak aurki litezke.

Manuel Lekuona lehendakari izan zuen “Kardaberaz” elkartearen bildumaren barnean doaz liburu guzti hauek, egileak idatzi bezala, gipuzkeraz. Xabi Oteroren azala ere asko gustatu zaigu, ederra oso.