« Filme laburren bilduma etxean ikusteko modua | Cristaubaren icasbidea edo Doctrina Cristiania »

Bizitzako gazi-gezak / Martin Iturbe / Kriselu, 1987

Bizitzako gazi-gezak Dabid Zuazalde / Argia, 1988-04-17

Aurreko batean, Martin Iturberen azken olerki lanak aipatu genituen, eta gaurkoan beste hau dakargu, hitz lauezkoa. Zazpi ipuin dira guztira liburua osatzen dutenak.

Zazpiak ere kutsu moral nabarmenez idatziak, irakaspen bat dutela helburu. Joera hori ez dago modan, jakina, baina guk ez dugu zertan modaren morroi izan eta alde horretatik ez dugu zer arbuiaturik. Nor bere bidea hautatzeko libre bait da. Edo hala beharko luke. Ondo baino hobeto biziko delakoan etxetik aldegiten duen eta gero penetan itzultzen den mutilarena eta halakoak dira argumentuak. Familia kontuak, munduaren ikuspegi kristaua…

Hizkuntza azpimarratu nahi genuke guk. Hizkera indartsu eta malgua darabil Iturbek. Esaldi bakoitza borobil tajutu eta behar den lekuan ebakia. Estilo hau ez da noski Martinek asmatua, baina sarritan eskertu egiten duzu halako euskara gozo, txukun eta adierazgarria dastatu ahal izana. Bestalde, euskaraganako amodioa txertatu zioten gurasoei eskaintzen dielako edo, gipuzkeraz egin nahi izan du. Dena den, h-ak eta beste bitxikeriaren bat kenduta batua balitz bezala (bidebatez: ez dakit ohartu zareten baina ohartu gabeko kutsaduraz nonbait, h-rik gabe eta idazten dutenen idazkera gero eta batuaren antz handiagokoa da).

Liburua laburtuz eta aipatu ditugun bi alderdiak, azal-mamiak, esaldi bakar batera bilduz, hauxe esango genuke: gure sermoilari onenen tradizioaren seme.