kritiken hemeroteka

7.584 kritika

Azken kritikak

« | »

Birundak (ele laburrak) / Ander Iturriotz / Luis Haranburu, 1982

Iturriotzen “Birundak”: Fruitu exotiko eta gotiko bat Mikel A. / Argia, 1983-01-23

Gure liburudendetako apal eta mahainak prosaz josiak esnatu dira urteberriarekin. Joria izan bait da 1982. urtea narratiba aldetik; edo hala eskeini nahi izan digute gure editore kupidagabeek. Liburu azaletan, “marketing”a dela eta, zertxobait saiatu dira. Bereziki batek deitu zigun guri adiera bertan agertzen zen marrazki edo collagearengatik: Birundak (ele laburrak). Egilea: Ander Iturriotz. Editorea. Haranburu Editor, S.A. Gurekin eraman genuen etxera.

Azala irristakorra

Liburu bati ematen zaion izenburua garrantzitsua izaten da. Horregatik jo genuen bai Azkue eta bai Arestigana. Lehenak hau esan zigun: “Manatu zuen populuak egin zezan zazpi egunez hiri hartako murru guzien birunda. (Larreguy)”. Bigarrenak guztiz argitu zigun: “Bira handia”. Iturriotzen lehen liburu honen izenburu osoa hau da: Guztia bailitzan zazpi gauen birunda. (Eta ez norbaitek Eginetik sinestarazi nahi izan zigun bezala: “Durundiak”).

Susa literatur aldizkariaren 4. zenbakian argitaratua zeukan A. Iturriotzek ipui bat: “Hilobi Ipotxak” izenekoa; horrek eta beste hamaikak-11 osatzen dute liburua. Iturriotzek idaztankera oso berezia darabil. Alde batetik, hitzak berreskuratu ditu. Bere hiztegi propioa sortu du, gaurregungo narratiban arruntak bilakatu diren hitzak baztertuz. Konzesiorik (ia konzesiorik) gabeko estiloan, lehen ipuinetik azkenerarte, mundu barroko bat eraiki du egileak. Gramatika egitura landuak eta hitzen bidez sortutako imajina zail bezain ederrak eskeintzen dira zenbait pasartetan. Honek zenbaiti liburua esku artetik irristaraziko dio. Zeren liburu hau poesia bailitz irakur daiteke. Poesia landu bat… Bainan, ele laburrak dira, ipuin liburu bat da.

Mamia exotikoa eta berria

Ele labur hauen mamiari begiratuz, eta orokorki, giro exotikoa atzematen da. Kutsu arkaikoa ere badarie eleei. Eta agian honetan egiten dute bat, arkaikotasunean, estiloak eta gaiak. Eta denborarekin hasiz gero, jarrai dezagun. Ipui edo ele labur hauek biltzeko erabil daiteken parametroa denbora bait da. Zenbait ipui mitikoak dira, mito bat kontatzen da horietan (“Itzazpikoneko azken neskutsa”, “Hilobi Ipotxak” eta “Tigresa maitale”). Denbora eza, edo hobe, edozein denboratan gerta daitezkeen ipuiak ere badira, ipui obsesiboak; hauetan protagonista guztiz harrapatzen duten gertaerak deskribatzen dira, kontatzen zaizkigu (“Amonaren orratz eztenak”, “Zaldi amorratuaren gisara”, “1933ko bikorren gudua” eta “Haragiz tenta lezantzat”). Lehenean kokatzen diren bi ipui (“Amenophi ginzeph” eta “Peilenen oinetako berrien eskertzaz”). Geroan kokatzen den beste bat, futurista eta komiki-desastre kutsua hartzen dioguna (“Desplazerrik eman gogo bazuen”). Gaur egungo gai bizi bat ikuitzen duen beste bat ere agertzen da, eta hau orainean kokatuko genuke; honetan Iturriotzen estilo hertsi eta zailak pistoia arrauntagotzen du (“Gutunak”). Eta amaitzeko ipui erromantiko bat, “Ehunate”, erromantikotasunaren giro ilunarekin eta sinboloz betea.

A. Iturriotzen ipui gehienetan sexoa ageri da, bainan egileak ez du abisatzen, hau da, sexoa arruntki agertzen da, kuttunki landua bainan inongo traumarik gabe. Hala behar duelako.

Hezurraren zaporea

Eta hezurrarekin bueltaka hasi baino lehen, behar ez lituzkeen akats eta erru gehiegirekin eskeini digula Haranburu editoreak liburu hau, aurkibiderik ere ez dakarkigu.

Non kokatu liburua? Egilea ausarki dakusgu letren eremu latzean barrena zaldi amorratu gisara. Ohitura eza ote liburu hau zail egiten duena? Ala ezjakintasuna? A. Iturriotz saiatu da bere mundua eskeintzen eta horretarako aukera bat egin du hizkera aldetik. Liburua zailagotzen duen aukera, bainan, beste guztjak bezala, liburu hau ere geroak epaituko du eta ziuraski salbatuko.

Azken kritikak

Poesia guztia
Safo

Igor Estankona

Gilles de Rais
Anjel Lertxundi

Javier Rojo

Bazterreko ahotsak
Miren Tirapu Goikoetxea

Amaia Alvarez Uria

Poesia guztia
Safo

Javier Rojo

Bakezale gerlari horiek
Bixente Serrano Izko

Txema Arinas

Moskito
Igor Estankona

Aitor Francos

Nobela errealista bat
Joxean Agirre

Marta Goikoetxea

Bitakora kaiera
Ibon Sarasola

Mikel Urkixo Aierdi

Zendabalitz
Erika Elizari

Alaitz Andreu

Gilles de Rais
Anjel Lertxundi

Marta Goikoetxea

Miserikordia etxea
Joan Margarit

Jose Luis Padron

Argiantza
Pello Lizarralde

Aiora Sampedro

Hotz industriala
Julen Belamuno

Joannes Jauregi

Hotz industriala
Julen Belamuno

Ibon Egaña

Artxiboa

Uztaila 2020

Ekaina 2020

Maiatza 2020

Apirila 2020

Martxoa 2020

Otsaila 2020

Urtarrila 2020

Abendua 2019

Azaroa 2019

Urria 2019

Iraila 2019

Abuztua 2019

Hedabideak