kritiken hemeroteka

7.174 kritika

Azken kritikak

« | »

Non dago basques' harbour / Koldo Izagirre / Susa, 1997

Faro segak Jose Jabier Fernandez / Euskaldunon Egunkaria, 1997-05-31

“Inperioaren aurka poesia baliatu behar dugula uste duten / Nire antzeko inozoak bilatzen dizut”. Zortzi urte pasa dira Koldo Izagirrek bere azken poesia liburua argitaratu zuenetik. Balizko erroten erresuma izenburua zuen liburu hura. Hau bere bosgarren poesia liburua da, eta 70eko hamarkadan hiru poesia liburu argitaratu bazituen ere, geroztik hogei urtetan bi soilik argitaratu ditu. “Halere bihotz duenak badu / Barkua non bete berba”.

“Poesia gure borroka bera denik uste ez duten / Nire antzeko inozoak bilatzen ditut”. Denbora gehiegi liburu bat eta bestearen artean? Guretzako, irakurleentzat, agian bai, baina Izagirrek sortu dituen poesia zoragarri hauek irakurri eta entzuteko hainbeste denbora itxaron behar bada, guregatik ez dago arazorik, zain egoteko prest gaude berriro ere. “Halere garaiz ikasi nuen / Barkua non bete berba”.

“Martiri batzuk beren fedea baino ederragoak direla uste duten / nire antzeko inozoak bilatzen ditut”. Izagirreren azken lan honetan bere ohiko estiloa aurkituko duzu, nahiz eta urteen poderioz aldaketa batzuk ere badauden. Ez dago gai finkorik bere olerkietan. Haria bai, gaiaren haria itsasoa, portuak eta untzien inguruan murgiltzen da. Baina liburuaren haria bakarra bada, jorratzen dituen gaiak asko dira. Aberria, maitasuna, beldurrak, heldutasuna… sentimendu hauek guztiak bere olerkietan daude, finkatu gabe, garbi utzi gabe, baina hor daude; batzuetan sentimendu guztiak olerki bakarrean, besteetan beraiekin jolastuz. “Halere beti aurkitu ohi dut / Barkua non bete berba”.

“Munduak gu ez maitatzeko eskubidea duela uste duten / Nire antzeko inozoak bilatzen ditut”. Estilo eta estruktura aldetik Izagirreren poesia ez da erraza. Arreta asko eskatzen du eta, hitz bakoitzak bere esanahi berezia duela garbi uzten du. Ez dira bat-bateko olerkiak, ongi pentsatutako eta asko landutako emaitza dela garbi dago. “Halere jator eskaintzen dizut / Nik barkua bete berba”.

“Sasiko amoranteen hilerri honek beste alderik ez duela uste duten / Nire antzeko inozoak bilatzen dizut”. Gaiak eta sentimenduak alde batera utziz, betidanik hunkitu nauena Izagirreren poesian, bere musikalitatea da. Askotan pentsatu izan dut, Izagirreren poemak irakurtzeko baino entzuteko direla. Badirudi itsasoko uhinak bezala bere olerkiek ere joan-etorria egiten dutela, hondartzako harearekin murgildu ordez gure belarri eta arimetan desagertzen badira ere. “Halere ez dut galtzen utziko / Nik barkua bete berba”.

“Geure buruaz besterik ezin dugula uste duten / Nire antzeko inozoak bilatzen ditut”. Izagirreren olerkietan ikuspegi nagusia nahikoa pesimista da. Bere barruan, gure barruan eta denon kanpoaldean begiratzen du eta, ez ditu oso ondorio alaiak ateratzen. Baina ez du etsitzen, ez da isiltzen, eta berak bere iritzia ematen digu, bere sentimenduak adierazten dizkigu eta, umiltasunarekin egiten badu ere, guretzako garrantzitsuak eta beharrezkoak dira. “Halere beti ekarriko dut / Nik barkua bete berba”.

“Banoa itsasmugan agertzen hasia den beste lurralde baterantz / izendatzen ausartzen ez naizen lurralderantz”. Ea lurralde hori laster aurkitzen duen Izagirrek. Bilatzen jarrai dezala soilik eskatzen diogu hemendik, eta aurkikuntza horren emaitzak maizago plazaratu ditzala. Eta noizbait mereziko lukeen lurralde bat aurkituko balu, ez dezala ahaztu, faro sega batzuekin abisua bidali.

Azken kritikak

Bihotzean daramagun mundua
Maite Darceles

Peru Iparragirre

Lurra bere erro gorrira
Karlos Linazasoro

Alex Uriarte Atxikallende

Kamisoi zuri zetazkoa
Alaine Agirre

Estibalitz Ezkerra

Larrutik ordaindua
Joseba Lozano

Javier Rojo

Fakirraren ahotsa
Harkaitz Cano

Ibon Egaña

Neguko argiak
Irati Elorrieta

Javier Rojo

Fakirraren ahotsa
Harkaitz Cano

Mikel Asurmendi

Sekula kontatu behar ez nizkizun gauzak
Iban Zaldua

Usoa Alberdi Fernández

Gure oroitzapenak
Joseba Sarrionandia

Marta Goikoetxea

Hariak
Yoseba Peña

Iratxe Esparza

Lurra bere erro gorrira
Karlos Linazasoro

Javier Rojo

Hegodun poemak
Aintzane Galardi

Jon Kortazar

Fakirraren ahotsa
Harkaitz Cano

Joannes Jauregi

Amek ez dute
Katixa Agirre

Aiora Sampedro

Artxiboa

Urtarrila 2019

Abendua 2018

Azaroa 2018

Urria 2018

Iraila 2018

Abuztua 2018

Uztaila 2018

Ekaina 2018

Maiatza 2018

Apirila 2018

Martxoa 2018

Otsaila 2018

Hedabideak