susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Lagun baten omenaldia | Faro segak »

Argia sortzen den izartegia / Juan Ramon Madariaga / Alberdania, 1996

Paisaiak Javier Rojo / El Correo, 1997-05-29

Juan Ramon Madariagak 1996. urteko kritika saria irabazi berria du poema liburu honekin. Idazleak poesian ohizkoak diren funtsezko gaiak erabiltzen ditu bere lan honetan ere: amodioa, heriotza, naturaleza. Gai hauek errepikatzeak, ordea, ez du esan nahi topikoaren esparruan mugitzen denik. Ideia horiek giza esperientziari lotutako oinarrizko ardatzak direlarik, beharrezkoa zaigu behin eta berriro horietara bueltatzea, horien inguruan mugitzea, gaiak inoiz agortu gabe. Horregatik, eta liburuetan beti norberaren esperientzia pertsonaletik zerbait ere badagoelako, paisaiak horrenbeste garrantzia du hemen. Egileak berak adierazi duenez, liburuaren zati handi bat Hegoamerikan zehar egindako bidaietan idatzita dago eta hango paisaiak ere bere aldea edukiko du liburu honen osaketan. Paisaia lekua baino, sinboloa izango litzateke horrela. Eta honekin batera, erabiltzen duen idazkera poetikoak ere badu garrantzirik: idazkera estilizatua du, ekialdeko eta iparraldeko euskalkietatik hartutako elementu asko jaso dituena; eguneroko hizkera arruntetik urruti, baina inolaz ere kriptografiara heldu gabe. Idazkera bera ere, sinboloa dugu Madariagaren poesian, haren baitan beste mundu baten ametsa laburbiltzen da-eta.