susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Urdina eta keria | Poesia behelainotan »

Ideia Zabaldu Tour 95 / Garbiñe Ubeda / Susa, 1995

Ideien kontrabandoan Xabier Artola / Euskaldunon Egunkaria, 1996-04-20

Garbiñe Ubedaren lana kazetari gisa ezaguna dugu Argia aldizkarian, baina orain Negu Gorriak taldearekin proiektu berri bati ekin dio. Hala bada, ohizko disko eta bideoetatik at, Ideia Zabaldu Tour 95 formatu berri batean aurkeztu digute, prosan alegia. Baina lan honek ez du Europan barrena egindako biraren ibilbidea deskribatzen soilik, bisitatutako lurraldeetako giro eta mobidak ere jakinarazten dizkigu: Italian, Alemanian eta Frantziako eta Espainiako estatuetan emandako kontzertuez gain, bertako gaztetxe edo antzekoen antolaketa erak, jendea, giroa, kontzertuak emateko izandako harremanak eta abar topatuko ditugu bertan.

Erromako Villaggio Globale, Florentziako CPA (Centro Populare Autogestito), Paduako SOC-Pedro (Spazio Occupato Conquistato-Pedro) eta Alemaniako, Frantziako eta Espainiako zentro eta musika aretoak ezagutzeko parada ematen digu Garbiñe Ubedak, baita bertako jendearekin izan duten erlazioa ere. Autogestione laboro edota Cultura Solidarietá leloek bertako giroa erakusten digute: elkartasuna alor guztietan, eta kultura alternatiboen aldeko apustua. Horretaz guztiaz gain, besteak beste Banda Bassotti, Wemean, Siniestro Total eta Revolver taldeekin izandako harreman estu eta beroa ere azaltzen digu, kontzertuak ematea posible egingo duten harremanak, alegia.

Egia esan, ezin genuke lau hitzetan laburbildu liburu honetan kontatzen den guztia: Bartzelona aldeko uholdeak, toxikazioak, polizi miaketa…

Hori guztia hogei kapitulutan geureganatzen digu Garbiñe Ubedak, biraren atal ezberdinak jasoz. Usurbilen furgoia kargatzen dutenetik (On the road kapituluan) azkenik Euskal Herrirako bideari ekiten dioten arte (Kortaturen kanta batek, Etxerat!, izena ematen dion kapituluan) hamaika gora-beheraren berri izango ditugu. Baina, gainera, hogei kapituluan ostean argazki eta material grafiko piloa aurkituko dugu, Birako azken emanaldiak eta Oiartzungo Hitz Egin kontzertuko arrakasta biltzen duen epilogoarekin batera, nolabaiteko balantzea eginez.

Bestalde, aberatsa dugu hizkuntza aldetik, bizia, egunerokoa. Erreala, azken batean. Eta horrek liburua irenstera bultzatuko gaitu. Errealitate hori ez da, ordea, idazkeran soilik islatzen, atzerriko giroa eta pertsonaien bitxikeriak ere oso tonu erreal eta naturalean dakuskigu. Akaso, bitxikeria horrek fan porrokatuentzat gustagarriak izango dira…

Beraz, irakurterraza, atsegina, behin hartu eta irakurtzeari uztea zaila den liburu baten aurrean garela esan behar. Ideia Zabaldu Tour 95: ikusitakoaren arabera, edo, hobeto esanda, irakurritakoaren arabera, ideia zabaldua.