susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Afari ordez, afari-merienda | Udarako nire irakurketa-gomendioa »

Itzuliko naiz / Pello Esnal / Sendoa, 1995

Eredugarria Joxe Beristain / Euskaldunon Egunkaria, 1995-07-16

Zer irtenbide eman bertso jarriei? Bertsozaleok askotan planteatutako galdera da hori. Sendoa argitaletxeak babesten duen Auspoa sailak ahalegin estimagarria egin berri du bertso jarriz osatutako bi liburu plazaratuz: Pello Esnalen “Itzuliko naiz” eta Antton Kazabonen “Koskotenekoak”.

Bertso jartzaileen lanak liburuetan plazaratzea ideia ona bada, egindako aukera ere txalogarria da. Ondo merezia zuen Pello Esnalek honelako bilduma bat. Eta ez Pello Esnalek bakarrik, baita tarteka-marteka haren bertso sorta sarituak irakurri eta gozatu ditugunok ere. Gustukoak izan eta gordetzea merezi zutela pentsatu, ustez toki jakinean gorde, eta gero, bertso haietaz gogoraturik, irakurri nahi eta ezin aurkitu, horixe gertatu zaigu Esnalen miresleoi behin baino gehiagotan. Orain txukun-txukun bilduak ditugu haren bertsorik onenak.

Beharbada batzuk ideologikoki Esnalengandik urrun sentituko dira, baina gaurko bertsolari gazteei ez lieke batere kalterik egingo Esnalen lanak irakurri, dastatu eta, horretarako betarik izanez gero, aztertzea. Bada alderik, bai, Esnalek darabilen euskaratik gaurko bertsolari gazte batzuek darabitenera, arranopola! Garbizaleegi izatea ere ez da ona izango, baina komeniko litzaiguke Esnalen gisako garbizale gehiago izatea, bai horixe!

Edozein bertsozaleren gustukoa izateko moduko liburua da Pello Esnalen “Itzuliko naiz”. Jarraitzeko moduko adibidea da Esnalena, eta baita Auspoa sailarena ere.