susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Ez balego beste mundurik | Korapiloak »

Poemak / Friedrich Hölderlin (Eduardo Gil Bera) / Erein, 2001

Poeta heroia Javier Rojo / El Correo, 2001-05-30

Friedrich Hölderlin (1770-1843) poesian aurki daitezkeen puntu gorenetako bat da dudarik gabe. Erromantizismo garaiko idazlea izanik, erromantizismo hori ez zen jarrera estetiko edo ideologiko bat bakarrik. Erromantizismoa bizimodua izan zen, idazlearen bizitzan hedatzen zen halabeharraren parekoagoa. Izan ere, idazleak Tragediak (horrela, letra larriz) jotako bizitza pairatu zuen, halako moldez non bera ere literaturarako gai bihurturik ikusten baitugu batzuetan, Peter Harlingen liburu eder hartan bezala.

Hirurogeita hamar urteko bizitza izan zuen arren, bere ibilbide poetikoa laburra izan zen urtez, ez ordea mamiz. XVIII. mendeko azken hamarkadan gauzatu zen eromenak idazleari urte ilunak ekarri zizkion arte. Orain “Poemak” izenburupean idazle honen antologia irakurri ahal dugu. Hasierako poemetan agertzen den ikasi nahi horretatik abiatuta, eromenerako bidaia honen lekukoak izango gara, eromenak ere idazle honen poesiaren bilakaeran azken gailurra erakusten digularik, isiltasuna eta mututasuna nagusi diren eremura helduta. Poesiaren esentziaraino heldu nahi izan zuen poetak, baina eromenarekin oraindu zuen bere ausardia. Irakurtzeko ez ezik, miresteko eta baita gurtzeko ere dugu Hölderlinen poesia.