susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Maitasuna puzzle bat da | Maitasunagatik egin zuen! »

Enaz banaz / Xabier Amuriza / Bertsolari Liburuak, 1999

Bikain eta aberatsa alderdi askotatik Juan Luis Zabala / Maxixatzen, 2001-05

Biografia, autobiografia eta antzeko liburu asko ari da argitaratzen azken aldian gure artean, baina gutxik dute, nire ustez, Amurizaren Enaz banaz-ek duen etorri emankorra eta indar zirrara-eragilea. Badira egilearen barru-barruko egiei bideak zabaltzen dizkieten liburuak, eta hau horietako bat da. Prosa bizi eta gozatsuan egiten du gainera hori, bizkaiera batu ezin samurragoan.

Bertsolaritzak azken 25 urteetan bizi izandako bilakabide itzelaren berri ematen du liburuak, bilakabide horren gidari eta bultzatzaile nagusietako baten ikuspuntutik gainera. Bertsozale batentzat, beraz, liburu hau irakurtzea perretxikotara lekua zein perretxikoak oso ondo ezagutzen dituen lagun batekin joatearen parekoa da; gozamenaren eta jakituriaren boltsa beteta etxeratzeko ziurtasuna du irakurtzen hasi aurretik ere.

Ez dago derrigor bertsozalea izan behar ordea Enaz banaz-en irakurketarekin gozatzeko. Bizkaiko herrialde txikietan 60ko hamarkadan bizi zen giroa, Azkoitian bizi izan zenaren oso antzekoa alderdi askotan, jakina oso modu atseginean dago jasoa liburuan, hainbat nobela ederren inbidiarik ez izateko moduan.

Alderdi sozio-politikoetatik haratago, abentura pertsonal baten kontaketa den aldetik ere edozein irakurle gozarazi eta asetzeko modukoa da liburua. Amurizak 1980 eta 1982ko Bertsolari Nagusietan txapel bana jantzi ondoren sufritu behar izan zuenaren kontaketak Franz Kafkaren narratiba ekarri dit niri behintzat gogora. Gregor Samsa gizarajoa ez zen Amuriza baino askoz okerrago sentituko.

Balio asko ditu, beraz, liburuak, balio horiek guztiek, seguru askorik, iturburu bakarra izan badute ere: zer kontatua eta kontatzeko gogoa duen idazle bikain bat.