« Itsasoaren mira | Estetika pertsonala »

Lur bat zure minari / Jose Luis Otamendi / Susa, 1995

Lurra eta amodioa Javier Rojo / El Correo, 1996-05-23

Jose Luis Otamendik poesia arloan kritika saria irabazi berria du liburu honekin. Idazle hau ez da euskal literaturan ezagunenetakoa, baina hamabost urteko ibilbidea egin du dagoeneko poesian. Hamabost urteko ibilbidea eta bost liburuko emaitza. Lur bat zure minari izeneko liburu hau bi zatitan banatu du, eta bi zatiok “Polderrak” eta “Almitzak” izenekin bataiatu ditu. Iradokizunez beteriko izenburuak eta liburuaren banaketak berak hainbat klabe eskaintzen dizkigu liburua ulertzeko. Izan ere, liburuan agertzen diren poemak amodiozkoak dira, baina amodio hau ez zaigu era idealizatu batean agertuko, ez da amodio erromantikoa izango. Askoz ere hurbilago eta errealago aurkeztuko zaio irakurleari, zeren esfortzuz irabazi eta zaindu behar den amodioaren aurrean baitago. Amodio honek, gauzatuko bada, lurraren beharra izango du, lanaren indarraz itsasoari irabazitako lurraren beharra, hain zuzen. Liburuak sinfonia baten itxura daukala irudituko zaio batzutan irakurleari, oinarrizko zenbait elementu (hitzak zein irudiak) liburuan zehar askotan errepikatzen baitira, lanari osotasuna emanez. Bestalde, estiloa dela eta, poesia gordina da idazle honena, erretorikari gutxitan amore ematen diona.