« Egin ezak eleberria, Koldo | Hiru ziren hiru »

Gure zinemaren historia petrala / Koldo Izagirre / Susa, 1996

Zinea aitzakia Javier Rojo / El Correo, 1997-06-05

Zinearen mendeurrena ospatuz bezala edo, gure artean Koldo Izagirreren liburu hau agertu da. Haren izenburua irakurtzeak sortzen dituen espektatibek, ordea, baten bat despista dezakete. Egia esan, zineak Euskal Herrian bete duen mendeari errepasoa egiten dio egileak, baina historiaren ikuspegia alde batera utzita, kronika pertsonalaren itxura eman dio lanari. Gauzak horrela, askotan denboraren linealtasuna hausten du, aurrera eta atzera joanez, gaiari baino idazlearen beraren subjetibotasunari men eginez. Ondorioa liburu berezia da: informazio asko ematen du, bai, baina sakabanatua eta egilearen ideologiaren galbahetik iragan ondoren. Behin baino gehiagotan, zinearenak aitzakia hutsa ematen du beste edozein gauzaz aritzeko; hemen, bada, zerbait garrantzitsua badago, egilearen ikuspegiaren nondik-norakoak azaltzea da. Hainbat zutabetan finkaturik agertzen da ikuspegi hori: euskararen aldeko joera erabatekoa; “muturreko herrikoitasuna” edo dei litekeena; eliza ofizialaren kontrako ikuspegia, moralari dagozkion kontuetan gehienbat; kolonialismo kulturala arbuiatzeko jarrera, batez ere yankien aldetik badator… Orri horietan esaten den gehiena muga hauen barruan dagoela ahaztu ezean, interesgarria suerta daiteke liburu hau.