susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Asfaltozko telefonoa | Abertzaleen auzia »

Berriro igo nauzu / Xabier Mendiguren Elizegi / Elkar, 1997

Etxeratzean Javier Rojo / El Correo, 1997-12-31

Azken urte hauetan indarkeria politikoa gai errekurrentea bihurtu da euskal literaturan. Idazlan batzuk, Atxagak edo Saizarbitoriak idatzitakoak adibidez, benetan interesgarriak dira. Beste batzuek, ordea, izena aipatzerik ere ez dute merezi. Xabier Mendiguren Elizegik ere moda honi heldu dio arazoaren beste ikuspuntu bat emateko: militantearen etxeratzea, espetxean hainbat urte bete ondoren. Istorio honek, liburuaren kontrazalean esaten duenari kasu egiten badiogu, umoretsua izan nahi luke. Nik, ordea, ez dut ia inondik ere umoretsutzat har litekeen elementurik aurkitu. Bestaldetik, argumentuak hausnarketarako beta ematen bazuen ere, ezker abertzalean behin eta berriro errepikatzen diren gaiak (kaleko istiluak; presoaren familia; ertzainak…) bata bestearen atzetik jartzeak aukera hori baztertzen du eta batzutan eleberri osoak bukaeran ematen den elkarrizketaren prestaera besterik ez dela dirudi: hor militante etxeratu berria eta damutu bat arituko dira indarkeriari buruz, topikoen amaraunetik askatu gabe. Xabier Mendiguren, hala ere, idazle trebea da. Hortaz, liburu hau topikoz jositako eleberri ahula izan arren, irakurgarria ere bada. Baina ez du inola ere Zeru horiek estaltzerik lortzen.