« Lore ederrak | Bizitzak eta ekintzak »

Euskara batuaren ajeak / Ibon Sarasola / Alberdania, 1997

Batua dela-eta Javier Rojo / El Correo, 1998-05-20

Ibon Sarasolak Euskara batuaren ajeak liburua idaztean euskara estandarraren inguruko eztabaida piztu nahi izan omen du. Bere liburuaren asmoa euskara batuak batez ere hiztegi kontuan ekarri duen nahastea azaltzea izan baita. Horretarako, hiztegi itxurako estilo liburu antzeko honetan hitz asko aztertzen ditu eta bere ustez zergatik diren desegokiak azaldu. Oinarrian dagoen teoria hauxe da: euskara batuaren hiztegia gaurkotzea gazteleraren eragin zuzenaren pean egin da, txukuntasunaren kalterako. Ondorioz, euskara batua iparraldeko eta hegoaldeko euskaldunak hurbiltzeko tresna izan beharrean, desberdintasunak areagotzeko balio izan du. Sarasolak adibide ugari eman eta beste hizkuntza batzuetan zer gertatzen den ere erakusten du, euskaldunok askotan hartu ditugun bide okerrak nabarmentzeko. Alde honetatik, eta kontuan hartuta erabiltzen duen informazioaren tamaina, nekez aurki daiteke alderdi txarrik liburuan. Gauza batzuk, ordea, ez zaizkit oso argi geratu. Irizpideak, adibidez: hasieratik argi daudela dirudi, baina irakurri ahala kasuistika hutsean amaitu dela iruditu zait. Liburuaren eragina, bestetik: beldur naiz hizkuntzaren erabiltzaile arruntek ez ote dituzten, hainbeste gorabeherarekin, gauzak nahasiago eta zailago ikusiko.