susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Altxorraren bila | Hitzak gezurretan »

Nada de agua en Madrid / Pello Esnal / Euskaltzaindia - BBK, 1998

Idazkera bikaina Javier Rojo / El Correo, 1998-07-29

Nada de agua en Madrid izen bitxia du Pello Esnalen nobela honek eta bertan azken urteotan euskal literaturan behin eta berriro aipatzen den gaia erabili du, gatazka politikoarena, alegia. 70.eko hamarkadaren azken urteetan kokatuta daude gertaerak. ETAko kide batzuek Beasaingo banketxe batean egin dute lapurketa eta ekintza hauetan zerikusirik izan gabe gertaeretan nahastuko da Felix, nobelako protagonista, topikoen zerrenda batetik atera izan bailitzan, apaiza, aroztegi bateko langilea eta gau eskolako euskara irakaslea ere badena. Ikasle baten eskaerari erantzunez, egun batzuetan izkutatuko ditu bere etxean lapurketa egin dutenetako bi. Gai honekin nobela interesgarria egin liteke, pertsonaien arteko konfliktoetan edota protagonistaren pentsamenduetan sakonduz gero. Baina kasu honetan idazleak horrelako gaiak erabili ditu euskaraz ondo baino hobeto idatzita dagoen testu bat egiteko euskarri moduan soilik. Zeren nobela honetako benetako protagonista ez baita Felix edo beste pertsonaia bat, euskara bera baizik. Bi ikuspuntutatik gainera: alde batetik, Pello Esnalen idazkera bikaina da; bestaldetik, liburua aipamen metalinguistikoz josita dago. Nobela den aldetik, ordea, ez zait hain liburu bikaina iruditzen.