susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Kresalaren talaiatik | Idazkera bikaina »

Triangelu hautsia / Txema Garcia-Viana / Alberdania, 1998

Altxorraren bila Javier Rojo / El Correo, 1998-07-22

Txema Garcia-Vianak bigarren karlistadan kokatu ditu bere eleberri honetan kontatzen dituen ekintzak. Garai horretan eta halako gatazka batean erdian egotea ezinezkoa delarik (honek, azken finean, alderdi bietan etsaiak edukitzea baitakar), mediku gazte batek Euskal Herritik ihes egin du Venezuelako bidea hartuta. Han misterio batekin topo egingo du eta lagun batzuekin altxor baten bila sartuko da oihanean. Eleberriak, momentu honetara arte abenturazkoa izango zela zirudien arren, misterio eta intrigazko osagaiak izango ditu aurrerantzean, ia-ia oihaneko nobela poliziakoa izan arte. Argumentu nagusi honetan, tarteka istoriotxo asko sartzen ditu egileak: indiarren elezaharrak, ametsak, egunkarietatik (itxuraz hala, behintzat) ateratako ataltxoak… Halako moldez, non azkenean altxorraren bilaketa honelako istoriotxoak kontatzeko aitzakiaren itxura handiago baitu, eleberriaren hari nagusiarena baino. Eleberria, edonola ere, ondo idatzita dago, eta batzutan oso interesgarria ere bada. Baina halako inpresio bitxia utzi dit: istorioa faltsua dela, argumentuan zuloak daudela (hau intrigazko istorio batean akats handia izan daiteke) eta hor kontatzen direnek ez diotela eleberriaren barneko eta berezko logika bati jarraitzen.