susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Gaurko Hego Afrika | Bidaiatzeko mapa »

Kea urruntzean / Mirari Garcia de Cortazar / Euskaltzaindia - BBK, 1998

Malenkoniazko giroa Javier Rojo / El Correo, 1998-08-26

Mirari Garcia de Cortazarrek Felipe Arrese Beitia Saria irabazi zuen 1997.ean liburu honekin. Obra hau poema solteek osatzen dute, gehienetan laburrak diren poemek. Dirudienez, liburua egiterakoan idazleak ez du aurretik pentsatutako egitasmo bat jarraitu eta ondorioz olerki lan bat baino, olerkien bilduma soila dela esan daiteke. Hortaz, bada, egituraren aldetik batasuna piska bat falta dute hango poemek, nahiz eta horietan zehar zenbait ezaugarri antzeko agertzen diren. Liburua gorpuzten duten ezaugarri horietako bat naturalezako elementuen agerpena da. Naturalezatik hartutako elementuok (eguraldiaz, landareez, itsasoaz…) aipatzen diren bitartean, gutxi dira, ordea, hiritarrak dei litezkeenak. Aipamen horiek, bestaldetik, oroimenarekin lotuta agertzen dira eta, horrela, liburu osoa malenkoniazko giro batez janzten dute. Giro bakartiak, etsipenaren sentimendua, eta olerkari batzuek hain gustoko dituzten ohiko osagaiek aurkezten ditu idazle honek hemen. Honekin batera, nitasuna ere agertzen da, baina oso motelduta nire ustez, batzutan “ni” hori nahiko inpertsonal eta orokorra izanik, arazorik gabe “gu” izatera pasatzen baita. Liburu polita, bai, baina niri behintzat déjà vu sentsazioa utzi dit.