susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Malenkoniazko giroa | Ikerketa zabala »

Bizkarrean tatuaturiko mapak / Harkaitz Cano / Elkarlanean, 1998

Bidaiatzeko mapa Felipe Juaristi / El Diario Vasco, 1998-08-29

Mundua ezagutzeko modu bat baino gehiago bada. Batzuk, garai honetan batez ere, tren, autobus, hegazkinetara igoko dira, urrutiko eta ez hain urrutiko tokiak ezagutzeko asmoz. Beste batzuek, inora gabe, etxeko zulotik mugitu gabe, mundua hartuko dute oroimenean. Harkaitz Canok liburu honetan bidaiatzeko era berezi, orijinal eta atsegina proposatzen digu.

Lehen lerrotik garbi azaltzen digu egitera goazen bidaia ez dela ohikoa izango, bukaeran ez dugula aurkituko souvenir tipikoren bat. Abisatuta gaude, beraz. Hortik aurrera irakurlearen esku dago, segitu ala ez, baina zinez merezi duelakoan nago, toki eta pertsonaia bitxiak ezagutzeko aukera eskaintzen badigu Harkaitz Cano idazle gazteak.

Ipuintzat jo daitezke liburuan bilduta dauden testuak. Eta ipuina diodanean errealitate zehatza ez den zerbaitez ari naiz. Errealitatea gainditu eta beste errealitatea sortzen duen ariketaz, noski.

Ipuin bakoitza hiri bati dagoki, edo, hobe esan, hiri bakoitzak ipuin bat eraikitzen du estatua balitz bezala. Lehena, Aljer izenekoa, alfabetoaren arabera horrela egokitzen baita, da eredugarriena. Berak azpimarratzen dizkigu gero, liburuko orrialdeetan barrena aurkituko ditugun tonu, estilo eta bestelako ezaugarriak.

Laburbilduz irudimenezko hiriak direla esan daiteke, erabat literarioak, baina, batzuetan, benetakoak baino politagoak, hiriak bisitatzeko gogoa pizten zaigu behintzat. Hori bera lortu zuen Italo Calvino delako batek, hiriei buruzko liburu batekin.

Laburrak dira hemengoak, aspertzeko astirik ematen ez dutenak, beraiez gozatzeko eta ez enpatxatzeko neurrikoak. Laburrean etekin hobea ateratzen dio Harkaitz Canok literaturari, luzean baino. Ipuin batzuk zoragarriak dira: La Paz esaterako, edo-eta Hong-Kong izenekoak.