susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« “B” serieko pertsona eta pertsonaiak | Falta izan dugun idazlea »

Keuner jaunaren kondairak / Bertolt Brecht (Joxerra Gartzia) / Alberdania, 1999

Brecht-en mamuak Javier Rojo / El Correo, 1999-07-07

Brecht-en Keuner jaunaren kondairak izeneko liburu honen azalean “narrazioa” hitza agertzen bada ere, zaila iruditzen zait liburu hau genero horretakotzat hartzea, non ez den narrazioa zentzu oso zabal batean hartzen. Berez, aforismoen bildumatik hurbilago dagoela dirudi. Eta aforismoekin gertatu ohi den bezala, aho biko ezpata bihur daitezke idazlearen eskuetan. Batetik, aforismoak pentsamendu sakonak era sotil eta adierazkorrean azaltzeko lanabesak izan daitezke. Bestaldetik, ordea, era sotil eta adierazkorraren liluran gera daiteke idazlea, sakon-itxuran ezereza edo ulertezina eskaintzen digularik. Oreka zail honetan mugitzen da idazlan hau. Brecht-en ideia (mamu) nagusiak azaltzen dira hemen: boterearekiko jarrera, gizakien arteko harremanak, jainkoa, dirua, intelektualei eta pentsalariei dagokien papera… Irudi inpresionista bailitzan garatzen da, koherentzia osoz jantzita batzutan, kontraesankorra bestetan. Idazkerak estilo biblikoaren itxura hartzen du askotan, parabolak erabiltzeko joerarekin. Brecht ezagutzeko liburu interesgarria, dudarik gabe. Arazoa, nire ustez, bestelakoa da. Brecht ez, baina bere mundua ezagutu nahi duen irakurlearentzat baliagarria izan al daiteke liburu hau? Hauxe nire duda.