susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Poema herrenak | Topikoen aurka »

Kalezuloko animalien itzalak / Lutxo Egia / Pamiela, 1999

Jolaserako gonbitea Javier Rojo / El Correo, 1999-12-08

Helduentzako literaturan kondagintza nagusi den neurri berberean, eta agian egoera hau imitatuz, haurrentzako literaturan ere kondagintza ez den guztia bigarren mailako postu bat betetzera behartuta dagoela ematen du. Izan ere, gutxi, oso gutxi izaten dira, haurrak gogoan, idazten diren poema liburuak. Lutxo Egiak Kalezuloko animalien itzalak izeneko lan honekin erronka horri aurre egin nahi izan dio. Liburu horretako poemen protagonistak animaliak dira; nonnahi aurki daitezkeen animalia arruntak, txakurrak, katuak, hegaztiak, mota desberdinetako zomorroak… erabiliko ditu idazleak bere poemak burutzeko. Formaren aldetik, laburrak dira gehienak, haikuak izan gabe, haikuetan ohikoak diren irudien elkarketen antzekoen eraginpean sortutakoak. Hitzen soinuekin baino, hitzen esanahiekin jolasteko helburua dute, animalien izenek iradokitzen dituzten metaforak eta esamoldeak, izen horien esanahi zuzenarekin nahastetik sortzen diren hitz jokuetan oinarritzen direlarik. Animalien irudiekin jolasteko gonbitea da, azken finean, liburu hau, puntako lana izan gabe ere, bere funtzioa duintasun osoz betetzen duena. Liburu honekin haurrek (eta, zergatik ez?, helduek ere) une dibertigarriak pasatzeko aukera izango dute.