« Bortizkeria urpean | Jolaserako gonbitea »

Katiluaren ipurdia / Martin Etxeberria Garro / Alberdania, 1999

Poema herrenak Javier Rojo / El Correo, 1999-12-01

Askotan beharrezkoa da gauza arruntei begirada desberdin batez behatzea. Honela gauza arrunten atzean izkutatzen den bestelako alderdia aurkitu ahalko dugu. Poesia delakoa, alegia. Martin Etxeberriak hori egin nahi izan bide du Katiluaren ipurdia-n, ohikotasunean aurkitzen den (izkutatzen den) beste alde hori nabarmendu. Alde honetatik, liburuak beste ikuspuntu bat (ez dakit berria den, baina ohikoa ez, behintzat) eskaini nahi izan du. Begirada berri bat. Baina… Ados nago gauza arrunten gainean zabaldu behar den begirada hori ezinbestekoa dela, hor dagoen poesia aurkitu ahal izateko, baina ez da nahikoa. Begirada hori hitzetan gauzatu behar da, begirada adierazi egin behar da, gauza arrunten gainean egin nahi den poesia arrunkeriarekin nahastuko ez bada. Eta honetan egiten dute huts, nire ustez, liburu honetako poemek. Gauza arruntetan poesia egon daiteke, baina gauza arruntak berak eta beren konstatazio soila ez dira inola ere poesia. Ezen, azkenean, zer du liburu honek, testua den aldetik, irakurleak poema-liburutzat har dezan? Agian begibistakoa bakarrik: lerro bakoitzaren amaiera non jarri idazleak hautatu duela eta ez dela orrialdearen neurriaren adurraren esku utzi. Oso gutxi, benetan, nire gustorako.