Barandiaran / Jon Aizpurua / Jexux Aizpurua / Elkarlanean, 1999

Barandiaran Javier Rojo / El Correo, 2000-01-26

Zaila da, benetan, Joxemigel Barandiaran bezalako pertsonaia garrantzitsu baten bizitza honelako liburu batean laburtzea, ezinbestean gauza asko eta asko aipatzeke geratu behar baitira. Barandiaranen bizitzan laburpen hori ia ezinezko bihurtzen duten eragozpen batzuk aurki daitezke: alde batetik, ehun urteko bizitza; bestetik, euskal kulturak XX. mendean izan duen pertsonaiarik garrantzitsuenetakoa dugu. Honez gainera, bere lana da bizitza honen alderdirik interesgarriena. Korapilo hauei aurre eginez, idazleek Barandiaran beraren hitzetan oinarritu dira nobela balitz bezala irakur daitekeen liburua egiteko. Eguneroko bizitzari buruzko datu jakingarriak eta bitxiak, gazte denboran politikan izan zuen jarrera integrista (euskaltzaleen artean gehienetan pentsatzen den baino zabalduago egon dena), lanak eta ikerketak aurrera eramateko gorabeherak, deserriko bizitza… gainetik behintzat Barandiaranen bizitzaren puntu garrantzitsuenak aipatzen dira biografia honetan. Barandiaran ezinbesteko pertsonaia dugu Euskal Herria ulertzeko, herri honi bere burua ezagutzen lagundu baitzion, herri tradizioa zertan zen erakutsiz. Orain biografia txiki honekin euskal etnologiaren aintzindaria pixka bat hobeto ezagutzeko aukera izan dezakegu.